- ఒడిశా రాష్ట్రానికి చెందిన మరొకరు..
ప్రజాశక్తి-హిందూపురం : శ్రీ సత్యసాయి జిల్లా హిందూపురంలో భారీ ఎత్తున పోలీసులు గంజాయిని స్వాధీనం చేసుకున్నారు. ఇందుకు సంబంధించిన వివరాలను టూటౌన్‌ సిఐ వై.శ్రీనివాసులు, రూరల్‌ అప్‌ గ్రేడ్‌ సిఐ కృష్ణారెడ్డి విలేకరులకు వెల్లడించారు. ఆదివారం రాత్రి శ్రీ సత్యసాయి జిల్లా టూటౌన్‌ స్టేషన్‌ పరిధిలోని భగిరథ సర్కిల్‌ మధుగిరి మారెమ్మ ఆలయ సమీపంలో అక్రమంగా గంజాయిని విక్రయిస్తున్న ఏడుగురిని పోలీసులు అరెస్టు చేశారు. వారి నుంచి 7.400 కిలోల గంజాయిని స్వాధీనం చేసుకున్నారు. అరెస్టు చేసిన వారిలో హిందూపురం పట్టణానికి చెందిన కళ్యాణ్‌ కుమార్‌, సోమేష్‌, నాగర్జున, అనిల్‌ కుమార్‌, తిరుమలేష్‌, మడకశిర మండలం శివపురం గ్రామానికి చెందిన సురేష్‌, కదిరి ప్రాంతం ఎర్రగుంటపల్లి గ్రామానికి చెందిన జంపాల సోమశేఖర్‌ ఉన్నారు. సోమవారం ఉదయం హిందూపురం రూరల్‌ మండలం గోళ్లాపురం పారిశ్రామికవాడలో చేపట్టిన తనిఖీల్లో గంజాయి తరలిస్తున్న ఒడిశా రాష్ట్రం గంజాం జిల్లా దిగపహండి తాలూకా పుడమరి గ్రామానికి చెందిన నిలాంచల్‌ను అరెస్ట్‌ చేశారు. అతని నుంచి 1500 గ్రాముల గంజాయిని స్వాధీనం చేసుకున్నారు.
